Qırımtatar gençleri iyül 22-de aqşam Kiyev Türkiye elçihanesi yanında aktsiyanı keçirip, iyül 20-de Türkiyeniñ Suruç şeerinde elâk olğanlarnıñ soy-sopları ve yaqınlarına taziyelerini bildirecek ve çeçeklerni qoyacaq olalar.
«Qırımtatar gençleri qardaş türk halqına taziyelerini bildireler. Bizler lâqayt qalmağanlarnı qoşulmağa ve qardaşlarımızğa bu zor vaqıtta birdemlik köstermege çağıramız», – dep aytıla qırımtatar gençler merkeziniñ muracaatında.
Çeçeklerni çarşenbe künü saat 18:50-de qoyacaqlar.
İyül 20-de Suriyeniñ Kobani şeerinden 10 kilometr mesafede yerleşken Suruç şeeriniñ medeniyet merkezinde patlav yüz berdi.
Türkiye İçki işler nazirligi patlavnı «terroristik ücüm» olaraq tanıdı, bazı memurlar «İslâm devleti» gruppirovkasınıñ alâqasını qayd eteler.
Merkezde sotsialistik gençler birlikleri Federatsiyasınıñ 300 azası otura edi. Olar kürd küçleriniñ «İslâm devleti» radikal gruppirovkasınıñ boyevikleri ile çatışmalarda zarar körgen Kobane şeerini ğayrıdan tikleycek ediler. İyün ayında «İslâm devletiniñ» ücümlerinden Kobanede 200 kişi elâk oldı.
