Link açıqlığı

Kiyev mahkemesi «Aydarnıñ» Qırım askerini ev apisine aldı


«Aydarnıñ» Qırım askeri Enver Velilâyevniñ qorantası Kiyevniñ Peçersk rayon mahkemesi yanında onıñ ev apisine azat etilmesini bekley

Kiyevniñ apellâtsion mahkemesi salı künü, iyül 21-de, «Aydar» Qırım askeri Enver Velilâyevni ev apisine aldı. Bunı ATR qırımtatar telekanalınıñ jurnalisti Elvina Seitbullayeva Facebook saifesinde bildirdi, – dep haber ete Qırım.Aqiqat.

Onıñ aytqanına köre, mahkeme toplaşuvında halq deputatı, Qırımtatar Milliy Meclisiniñ reisi Refat Çubarov Enver Velilâyevni onıñ kefaleti esasında azat etmege rica etti.

«Bundan evel Peçersk mahkemesinde halq deputatı ve qırımtatarlarnıñ lideri Mustafa Cemilev ve İgor Lapin «Aydar» askerini azat etmege rica etken ediler. Mahkemeciler toplaşuvnı iyül 27-ge qaldırmaq istediler, lâkin adliyeciler maqsadına iriştiler. Esnas videokonferentsiya şeklinde keçirildi. «Aydar» batalyonınıñ askerleri Enverge qoltutmağa keldiler. Jitomirden Enverniñ babası, ömür arqadaşı – Elzara Velilâyeva ve eki çağına yetmegen balası keldiler. Babasını yaqalanğanından berli körmediler, tek televizorde», – dep yazdı Elvina Seitbullayeva.

Kiyev Peçersk rayon mahkemesi iyül 8-de «Aydar» batalyonınıñ Qırım göñüllisi Enver Velilâyevniñ apis cezasını yarım yılğa qadar uzatqan edi.

Kiyevde iyün 20-de keçirilgen mahkeme toplaşuvında Qırımtatar Milliy Meclisiniñ reisi, Ukraina halq deputatı Refat Çubarov Velilâyevni kefillik altına almağa rica etti. Mahkemeci kefilniñ «işi çoq dep» şübelendi. Qırımlı apiste qaldı.

«Aydar» askeri uquq qoruyıcı organlarnıñ hadimlerine qarşı zorbalıq qullanğanında, aydutlıqta, adam hırsızlığı ve arbiy bölükni öz başına terk etmesinde qabaatlana.

Bu işte Velilâyevnen beraber «Aydarnıñ» diger askerleri de keçe, şu cümleden Aleksandr Babiç, Nikolay Ştirhun, Viktor Gerçak ve Nikolay Lâşçuk, olarnı mart 18-de Baş arbiy prokuraturanıñ hadimleri Ukraina havfsızlıq hızmeti ile beraber yaqaladılar.

XS
SM
MD
LG