Rostov-na-Donu şeerineki Şimal-Kavkaz arbiy bölge mahekmesinde iyül 21-de Qırımdaki teraktlarnıñ işi boyunca diñlevler keçirile. Ukrain rejissöri Oleg Sentsov ve Qırım faali Aleksandr Kolçenkoğa qabaat qısımlarını seslendirdiler. Mahküm etilgenler qabaatlarını tanımağanlarını bildirdiler.
«Oleg Sentsovnıñ qabaatı şunda ki, o, 2014 senesi mart ayında «Pravıy sektordan» Qırımda teşkilâtnıñ bölüklerini açmaq ve cumhuriyette vaziyetni kerginleştirmek ve cumhuriyetniñ Rusiye terkibinden çıqması içün akimiyet organlarına tesir etmek vazifelerini aldı», – dep tekrarlay devlet qabaatlayıcısını Mediazona.
Devlet qabaatlayıcısı sözüni bitirgen soñ Sentsov şunı dedi: «Özümni qabaatlı saymayım, endi aytqan edim. Daa bir kere tekrarlarım, men bu işni siyasiy ve uydurılğan sayam. Prokurorğa sualim bar: angi akimiyet organlarına tesir etecek edim?».
Mahkemeci mahküm etilgen kişi prokurorğa sual berip olamağanını qayd etti.
Kolçenko «terroristik teşkilâtlarda iştirak etüv ve terakt qabaatlarına» Sentsov kibi cevap berdi: «Qabaatımnı tanımayım».
Oleg Sentsov ve Aleksandr Kolçenkonı 2014 senesi mayısta apiske aldılar. FSB (Federal havfsızlıq hızmeti – muar.) olarnı Rusiyede yasaq etilgen «Pravıy sektor» ukrain teşkilâtınıñ azaları olaraq ilân etti. Taqiqatqa köre, olar bir sıra Qırım şeerinde terroristik aktlarnı keçirecek ediler, bundan ğayrı, demir yol köpürleri, elektrik yollarını yoq etmek kerek ediler. Kolçenko eñ azından 10 yılğa, Sentsov ise 20 yılğa qadar azatlıqtan marum qala bile. Ekisi de yaqalanğanından berli qabaatını red ete.
Bir sıra Rusiye ve çetel sanat erbabı ve uquq qorçalayıcısı Oleg Sentsovğa qoltutıp, oña qarşı çıqarılğan qabaatlarnı udurılğan ve siyasetnen bağlı olğanını tüşüne. Kolçenkoğa qoltutuv aktsiyaları bütün dünyada keçirilmekte.
