Link açıqlığı

İşğal etilgen Qırım mezunları içün Tışqı mustaqil imtianlarını iyül 27-ge qadar uzattılar, dep bildirdi «Almenda» vatandaş maarifi merkezi» cemaat teşkilâtınıñ eksperti Valentina Potapova Kiyevdeki matbuat konferentsiyasında iyül 21-de, dep haber ete Qırım.Aqiqat.

«Qırımlılar içün ZNO (Tışqı mustaqil imtianları – muar.) uzatıldı. İyül 27-ge qadar birisi attestat almağa yetiştirse, onıñ ZNO imtianlarını bermek imkânı olacaq», – dedi o.

Ukraina tasil ve ilim naziriniñ muavini Oleg Derevânko bu sebepten qırımlılar içün aliy oquv yurtlarına vesiqa berüv müddeti uzatıldımı sualine cevap berip olamadı.

«Şimdi cevap berip olamayım. Mence, ZNO uzatılğan olsa, vesiqa berüv müddeti de uzatılacaqtır... Matbuat konferentsiyasından soñ toplaşıp bunı yapa bilemizmi baqacaqmız», – dep qayd etti nazir muavini.

Derevânko bildirdi ki, sentâbr 1-ge qadar Qırımnıñ mektep talebeleri içün Ukrainada ukrain attestatlarını almaq imkânları bar.

Bu sene Qırım mektepleriniñ 65 mezunı Tışqı mustaqil imtianlarında iştirak etti, keçken sene ukrain testlerini 300 kişi bergen edi.

Ukraina tasil ve ilim nazirliigi 2015 senesi Qırım mezunları içün qayd işlerini iyün 27-ge qadar uzatqan edi.

Ukrain nazirligi bir qaç kere tenbiyeledi – Rusiye attestatını alğan qırımlılar ukrain aliy oquv yurtlarında tasil alamazlar. Bu sene Qırım mektepleriniñ mezunları qıtaiy Ukrainadaki mekteplerden birinde qayd olıp, onı ğıyabiy şekilde bitirmek ve imtianlarnı bermek kerek ediler.

XS
SM
MD
LG