Link açıqlığı

Qırımnıñ Rusiye yolbaşçısı Sergey Aksenovnıñ aytqanına köre, yarımadada devlet akimiyeti organlarında çalışmağa istegenlerniñ sayısı ep eksile, qısqartmalar ola.

Bunı o Lenta.ru neşirine bildirdi.

«Bugünki künde devlet hızmetine nevbet yoq. Qısqartmalar ola, adamlar işten keteler – motivatsiya yoq. Biz er saada tecribeli mütehassıslarnı ğayıp etemiz», – dedi o.

Aksenovnıñ bildirgenine köre, Qırımda devlet hızmetçileri çoq çalışa, amma aylıqları yüksek degil.

«Adamlar nasıl çalışa ve ne qadar ala, barıp baqıñız. Bunı körseñiz, olarğa emek qaramanlığı içün medal bermek kerek, dep aytarsıñız», – dep ayttı o.

Qırımnıñ Rusiye emek ve içtimaiy qoruv naziri Yelena Romanovskaya bildirgeni kibi, Qırımda 2015 senesiniñ başında içtimaiy qoruv idaresi hadimleriniñ aman-aman yarısı iş çoq olğanından ve aylıqlar yüksek olmağanından işten ayırıldı.

Qırımnıñ emek merkeziniñ müdiri Sergey Brodovskiy bildirdi ki, Qırımda ekimler devlet hastahanelerinde çalışmağa istemeyler, çünki az para alalar.

Rusiye 2014 senesi mart ayında Qırımnı işğal etip, onı öz terkibine qoştı.

Ukraina ve Ğarp memleketleri Qırımnı vaqtınca işğal etilgen topraq sayalar ve Rusiyeni cezalaylar.

XS
SM
MD
LG