Link açıqlığı

Türkiye akimiyeti salı künü Suriye ile sıñırda qaravullarnı quvetleştirmek niyetleri aqqında bildirdi. Böyle qarar Suruç şeeriniñ medeniyet merkezinde olıp keçken terakttan soñ qabul etildi. Patlav neticesinde eñ azından 30 kişi elâk oldı ve yüzden ziyade yaralandı.

Türkiye baş naziri Ahmet Davutoğlu bildirdi ki, Türkiye «İslâm devletine» qarşı bütün zarur olğan areketlerni yapacaq. Davutoğlu qayd etti ki: «Suriye ile sıñırımızda tedbirler quvetleştirilecek».

İstanbulda Türkiye ükümetini ücümde qabaatlağan kürd numayışçılarına qarşı politsiya közyaş gazını, vodomet ve rezina qurşunlarını qullandı.

Patlav Suruç şeeriniñ medeniyet merkezinde, Suriyeniñ Kobane şeerinden 10 kilometr mesafede, iyül 20-de yüz berdi.

Türkiye İçki işler nazirligi patlavnı «terroristik ücüm» olaraq tanıdı, bazı memurlar «İslâm devleti» gruppirovkasınıñ alâqasını qayd eteler.

Merkezde sotsialistik gençler birlikleri Federatsiyasınıñ 300 azası otura edi. Olar kürd küçleriniñ «İslâm devleti» radikal gruppirovkasınıñ boyevikleri ile çatışmalarda zarar körgen Kobane şeerini ğayrıdan tikleycek ediler. İyün ayında «İslâm devletiniñ» ücümlerinden Kobanede 200 kişi elâk oldı.

XS
SM
MD
LG