Ukrainağa köçip kelgen Rusiye jurnalisti Ayder Mujdabayev Kiyevden yayın yapmağa başlağan ATR qırımtatar telekanalınıñ baş müdir muavini vazifesine tayinlendi.
Bunı telekanalnıñ haber yayınlarınıñ muarriri Osman Paşayev Qırım.Aqiqat mühbirine bildirdi.
Mujdabayev bu malümatnı Ukrainskaya pravda neşirine tasdıqlap, şimdiki vazife «yayınlarnı tiklemek ve saba yayınına başlamaq», dep qayd etti.
Mujdabayev Moskovskiy komsomolets gazetasından ayırılğan soñ iş aqqında aytmay edi, qıtaiy Ukrainada ATR yayınını ğayrıdan tiklemege yardım etkeni belli edi.
Ayder Mujdabayev «Moskovskiy komsomolets» gazetasınıñ baş muarririniñ muavini olıp çalışa edi, Moskva Helsinki gruppasınıñ insan aqları saasında mukâfat laureatı ola, Qırım işğali ve Ukrainada Rusiye istilâsını sert şekilde takbih etken Rusiye jurnalistlerinden biri. Jurnalist Radio Svoboda yayınlarınıñ musafiri ola. Qırım.Aqiqat Mujdabayevniñ bloglarını ve intervyülarını derc etken edi.
2015 senesi aprel 1-den itibaren dünyanıñ yekâne ATR qırımtatar telekanalı yarımadadan yayın yapıp olamay, çünki Rusiye litsenziyasını alamadı.
İyün 17-de, mubarek Ramazan ayı arfesinde, «ATR» ve «LÂLE» telekanalları uydu ve internet vastasınen Kiyevden yayın yapmağa başladılar. İyün 20-den itibaren «Zaman» haberleri qırımtatarca, ukraince ve rusça çıqacaq – künde üç kere (17:30, 19:30 ve 21:30).
