Link açıqlığı

Qırımnıñ mektep talebeleri imtianlarğa azırlana ve ukrain tilini ögrene bileler – «Vozrojdeniye» Fondunıñ leyhası


«Qırımlılar içün tasil» haber-maarif online-resursına yañı malümatlar qoşuldı.

Leyha reberi, «Ukrain evi» Qırımnıñ iş ve medeniyet işbirligi merkezi» cemaat teşkilâtınıñ reisi Andrey Şçekunnıñ bildirgenine köre, tasil saytında PDF formatında ukrain tili ve edebiyatından Tışqı mustaqil imtianlarınıñ test variantları, em de ukrain edebiyatı boyunca ses kitapları peyda oldı.

Teklif etilgen sayt «Vozrojdeniye» Halqara fondu qoltutqan ukrain tili ve edebiyatını online şekilde ögrenüv leyhasına köre azırlandı.

Leyha maqsadı oca hızmetleri, ukrain tili ve edebiyatı ocaları olmağan insanlar, ukrain tilini ögrenmege tırışqan ve tasil ihtiyaclarını qarşılamağa istegen talebelerge bedava hızmet etmektir, dep hatırlattı Şçekun.

«Almenda» vatandaş maarifi Merkeziniñ tasil meselelerinden ekspert-analitik Oleg Ohredko bildirgenine köre, Qırım mezunları ukrain aliy oquv yurtlarına kire bilmek içün Tışqı mustaqil imtianlarını uzaqtan bere bileler, lâkin Ukraina tasil Nazirligi qarar almaq kerek.

Bu sene Qırım mektepleriniñ 65 mezunı Tışqı mustaqil imtianlarında iştirak etti, keçken sene ukrain testlerini 300 kişi bergen edi.

Ukraina tasil ve ilim nazirliigi 2015 senesi Qırım mezunları içün qayd işlerini iyün 27-ge qadar uzatqan edi.

Ukrain nazirligi bir qaç kere tenbiyeledi – Rusiye attestatını alğan qırımlılar ukrain aliy oquv yurtlarında tasil alamazlar. Bu sene Qırım mektepleriniñ mezunları qıtaiy Ukrainadaki mekteplerden birinde qayd olıp, onı ğıyabiy şekilde bitirmek ve imtianlarnı bermek kerek ediler.

XS
SM
MD
LG