Qırımdan köçip kelgen beş yaşında İlyas Seydametov Kiyevde Quran hafızları yarışınıñ ğalibi oldı. Oraza bayramı künü, iyül 18-de, yarış iştirakçileri para mukâfatları ve bahşışlarnı aldılar, dep haber ete Qırım.Aqiqat mühbiri.
«Ukraina musulmanları birligi» cemaat teşkilâtı «Qırımtatar cemiyeti» (Kiyev) ile beraber iyül 14-15 künleri Quran-ı Kerimniñ soñki cuzı (otuzda bir qısmı) boyunca yarış keçirdiler. İştirakçilerniñ ezberine, oquv qaidelerine riayet etmesi ve telâffuzına qıymet kesildi.
İştirakçilerniñ çoqusı Qırımdan köçip kelgenler edi. 20 kişi, erkek, qadın ve balalar, bilgilerini jürige kösterdi. Yarış teşkilâtçılarınıñ qayd etkenine köre, İlyas eñ genç iştirakçi olsa da, ğalebesini kerçekten de qazandı.
Qırım.Aqiqat bildirgeni kibi, yarış ğalibi içün bahşış 10 biñ grivna, ekinci yer – beş biñ, üçünci yer ise eki biñ grivnanı teşkil etti.
Ramazan ayı devamında Quran oqula. Quran metni 30 aman-aman aynı qısımğa bölüne, olarnı Ramazannıñ 30 künü devamında oquylar.
