İyün 18-den itibaren qıtaiy Ukrainadan yayın yapmağa başlağan ATR qırımtatar telekanalı avgust 1-2 künleri Ankarada (Türkiye) keçirilmesi planlaştırılğan II Bütündünya qırımtatar kongressini canlı yayında kösterecek ola, dep haber ete QHA.
ATR saibi Lenur İslâmovnıñ aytqanına köre, 24 saatten 8 saat devamında yayın Ankaradan, şu cümleden Kongressten yapılacaq.
Türkiye paytahtına «Zaman» haberleriniñ hadimleri kelecek, canlı çıqışlardan ğayrı haber yayınları da olacaq.
Hatırlatamız, Kongress Ankaradaki 750 insannı sığdırğan «Bilkent Otel» konferents-zalında keçirilecek. Qırımtatar cemaat teşkilâtları vekilleriniñ Kongressni iştirakçi ve musafir olaraq ziyaret etmek isteklerini bildirgenlerniñ sayısı çoq olğanından sebep teşkilâtçılar büyük zalnı sayladılar.
II Bütündünya qırımtatar kongressiniñ işine Qurultay ve Meclisni tanığan ve olarnıñ qararlarına köre faaliyet köstergen bütün qırımtatar cemaat, siyaset teşkilâtları ve areketleri, fond, sanat taqımları, milliy matbuat vastaları davet etile.
Ukraina, Türkiye, Romaniya, Bulğaristan, Rusiye, Poloniya, Qazahistan, Qırğızistan, Frenkistan, Amerika Qoşma Ştatları ve diger memleketlerden iştirakçilerniñ kelmesi beklenile.
Cemaat teşkilâtlarından ğayrı Kongresske Qırımtatar Milliy Meclisiniñ azaları, tevtiş komissiyasınıñ azaları, regional Meclislerniñ reisleri ve olarnıñ muavinleri, Qırım musulmanları Diniy idaresiniñ vekilleri davet etilecek.
I Bütündünya qırımtatar kongressi Aqmescitte 2009 senesi mayısta olıp keçken edi. Kongresste tahminen 800 kişi iştirak etken edi – 12 memleketten 160 qırımtatar cemaat-siyasiy teşkilâtınıñ vekili.
