Bu sene Oraza bayramında Qırım camileri rıqma-rıq tolu. Qırım.Aqiqat mühbiriniñ malümatına köre, keç qalğanlar özüne yer tapıp olamay ediler.
«Musulman bayramları künleri bile camilerde o qadar adam körmedim. Camilerge daa çoq gençler kelgenine quvanam. Oraza bayramı – orazadan soñ kelgen büyük bayram. Bu sene aman-aman bütün musulman tanışlarım oraza tuttı. Oraza bay ve fuqarelerni bir ete, zenginlerge fuqare adamlarnıñ duyğularını is etmege yardım ete, meramet ve şefqat aqqında hatırlamağa imkân bere. İslâm – ikmetli bir din», – dep ayttı qırımtatar milliy areketiniñ veteranı, Qarasuvbazar sakini Abdureşit Cepparov Qırım.Aqiqat mühbirine.
Bu sene Qarasuvbazarda iş adamı Resul Velilâyevniñ maddiy yardımı sayesinde büyük Cuma cami açıldı. Al-azırda cami Qırım musulmanları Diniy idaresine ait.
