Qarasuvbazar rayonınıñ Köktaş (şimdiki Sinekamenka) köyünde ğayrıdan tiklengen orta asırnıñ Köktaş camisinde cuma künü Oraza bayram namazı qılındı, dep haber ete Qırım musulmanları diniy idaresi.
«2014 senesi küzde saqat olğan Seyran Kerimov, yerli sakinlerniñ aytqanına köre, 16 asırğa ait camini ğayrıdan tiklemege teklif etkende çoqusı adam bunıñ imkânsız olğanını tüşüne edi. Amma bugün, bir yıl bile keçmegende, ğayrıdan tiklengen camide birinci bayram namazı qılındı. Belki de, aman-aman bir asırdan soñ birinci namaz (mında soñki namaz ne vaqıt qılındı tam belli degil, lâkin cami kirişinde tamir işleri 1895 senesi keçirilgeni yazıla», – dep aytıla Müftiyatnıñ beyanatında.
İyül 12-de camide birinci cemaat iftarı olıp keçti. Tahminen 80 kişi keldi. Yerli sakinlerniñ aytqanına köre, qırımtatarlar 80-inci – 90-ıncı seneleri qaytıp kelmege başlağan soñ köyde cemaat iftarları keçirilmegen edi.
Musulman cemiyeti özü aş pişirip, bütün köyni iftarğa davet etti, adamlar quvanç közyaşlarını gizlemeyip, camini ğayrıdan tiklemege yardım etken er keske teşekkürler bildire ediler. Al-azırda para toplana, caminiñ minaresi ve qorasına daa para kerek.
