Ukraina mudafaa Nazirliginiñ Rusiye ordularınıñ Qırımdan qıtağa ücüm ete bilecegini tasdıqlağan malümatları bar. Bunı Ukraina mudafaa naziriniñ muavini Petr Mehed Qırım.Aqiqatqa bildirdi.
Onıñ qayd etkenine köre, bu malümat mudafaa nazirligi içün yañı degil.
«Keçken sene fevral ayından berli Rusiye Federatsiyası ordularınıñ Ukrainağa ücüm telükesi bar. Şu cümleden, işğal etilgen Qırım ve «Pridnestrovye Moldova cumhuriyetinden» ücüm etile bile», – dedi Mehed.
Onıñ qayd etkenine köre, Silâlı quvetlerge bu plannı yerine ketirmege imkân bermemege emir etildi ve olar bunı yaparlar.
Ukraina prezidenti istihbarat malümatlarına esaslanıp, Rusiye orduları Ukrainağa ücüm etmege azırlanğanını bildirdi. Bir sıra ukrain ve halqara eksperti ve siyasetçisi Rusiye ordusı işğal etilgen Donetsk vilâyetiniñ topraqlarından işğal etilgen Qırımğa «ayat keçirmege» tırışqanından qasevetini bildirgen edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
