Qırımda Oraza bayramını bir qaç kün qayd etecekler. Qırım.Aqiqat mühbiriniñ malümatına köre, bayram tedbirleri cumaertesi künü de keçirilecek. Aqyar civarında Baydar uvasındaki Baydar köyünde (şimdiki – Orlinoye) bir sıra medeniy tedbir ötkerilecek.
Aqyar regional Meclisi bildire ki, tedbirniñ saat 11-de başlaycaq tantanalı qısmı çerçivesinde Qırım ve Aqyar qırımtatar cemaatınıñ vekilleri çıqışta bulunacaqlar, soñra ise kontsert programması başlanacaq.
Meclis vekiliniñ aytqanına köre, kontsert programması çerçivesinde seyirciler qırımtatar oyun ve ses-çalğı ansamblleriniñ çıqışlarını körecekler, milliy sanat sergileri keçirilecek. Mahsus davet etilgen musafirler de olacaq.
Qırımda Oraza bayramı munasebetinen iyül 17 künü tatil ilân etildi.
