Link açıqlığı

Saatnıñ esas haberi

Qırımda Oraza bayramında imamnı eki yılğa qadar şartlı olaraq apiske aldılar


Bağçasaray rayon mahkemesi iyül 17-de yerli sakin, cami imamı Mustafa Yağyayevge üküm çıqarıp, onı şartlı olaraq eki yılğa qadar azatlıqtan marum qaldırdı.

Bunı Qırım Rusiye prokuraturasınıñ matbuat hızmeti bildire.

Berilgen malümatqa köre, bu insan Rusiye qanunlarına köre «nefret ya da dava sebebi olğan areketler ve insan itibarınıñ tüşürilmesi» maddesi boyunca qabaatlı olaraq tanıla.

«Mahküm etilgen kişi «Jeleznodorojnıy» mesken-kommunal hocalığında işte bulunıp, müessise hadimlerine qarşı, teşkerüv neticelerine köre, nefret ya da dava, em de insan itibarınıñ tüşürilmesine yol bergen sözlerni qullandı», – dep haber ete matbuat hızmeti.

Şartlı apis cezasından ğayrı imam malümatnı tarqatuv faaliyetinen 2 yıl devamında oğraşamaz.

Qırımtatar Milliy Meclisiniñ malümatına köre, üç işdeşi Mustafa Yağyayevden şikâyet etip, onı «Qırım ve Ukraina ile bağlı laflarda, ruslarnı qorquzuvlarda» qabaatladı. Adliyecisi Emil Kürbedinovnıñ aytqanına köre, Mustafa Yağyayev bunı red ete ve küçük zıddiyet olğanını bildire.

Bu vaqia Yağyayevniñ işinde 2014 senesi iyün ayında olğan edi. 2014 senesi dekabr 18-de uquq qoruyıcılar onıñ evinde tintüv keçirip, qorantanıñ bir qaç diniy kitabını, bilgisayarnıñ qattı diski, fotoresimleri, cep telefonları, em de bazı vesiqalarını alıp kettiler. Yağyayev Bağçasaray rayonınıñ Teberti köyüniñ (şimdiki Turgenevka, – muar.) cami imamı edi.

Cuma künü, iyül 17-de, musulmanlar, şu cümleden Qırımda, Oraza bayramını qayd eteler. Bu bayram İslâm taqviminiñ eñ büyük eki bayramından biridir.

XS
SM
MD
LG