Cuma künü, iyül 17-de, tahminen 800 kişi Aqmescitteki Zenaat birlikleri medeniyet sarayında Oraza bayram namazına toplaştı, dep haber ete Qırım.Aqiqat.
Saba saat 5-ten başlap adamlar binanıñ mermer zalında toplaşmağa başladılar. Mında 15 yıldan berli bayram namazları qılına, çünki Aqmescitte er kesni sığdıracaq Cuma cami alâ daa yoq.
Saat 6-larda Qırım musulmanları müftisi acı Emirali Ablayev dua oqudı. Müfti musulmanlarnı birlik ve barışıqqa, qartlarğa ürmet ve sayğı köstermege, imannı qaviyleştirmege çağırdı. Bundan soñra Emirali Ablayev bayram namazını keçirdi.
İyül 17 künü Qırımnıñ bütün camilerinde bayram namazları qılındı.
Qırımda Oraza bayramı – bayram namazı (fotogalereya)
Oraza bayram – Ramazan ayınıñ orazası bitkenini ifadelegen islâm taqviminiñ eki büyük bayramından biridir. Bu sene bayram iyül 17-ge rastkeldi, bayramnı üç kün boyunca qayd eteler.
