Tam bir yıl evelsi, iyül 17-de, Donbassta «Malayziya ava yollarınıñ» 298 insan ile «Boeing-777» uçağı tüşürilgen edi. Donetsk vilâyetinde MN17 seferiniñ uçağı tüşken yerde matem tedbirleri keçirilecek, bunıñ kibi tedbirler felâket qurbanlarınıñ soy-sopları yaşağan diger memleketlerde de ötkerilecektir.
Facia taqiqatı devam etmekte, Felemenk taqiqatçıları oktâbr ayında maruzanı aydınlatmağa vade eteler. Birleşken Milletler Teşkilâtı seviyesinde uçaq tüşürilmesine alâqası olğan şahıslar içün halqara tribunalnıñ meydanğa ketirilmesi aqqında munaqaşalar devam etmekte.
Rusiye böyle bir tribunalğa qarşı çıqıp, onı «semeresiz» dep saya.
Yuqarı Rada Birleşken Milletler Teşkilâtına muracaatnı qabul etip, keçken sene Malaysian Airlines ava yollarınıñ MN17 uçağınıñ tüşürilmesine alâqası olğan mesüliyetli insanlar içün halqara mahkemeni meydanğa ketirmege rica etti.
Bu künleri keçken sene Donbass üzerinde kökte MN17 seferiniñ felâketke oğrağan yolcu uçağı içün halqara ceza mahkemesini meydanğa ketirmek ricası beş memleketten keldi – Avstraliya, Belçika, Malayziya, Felemenk ve Ukraina. Malayziya işbu rezolütsiyanıñ leyhasını da azırlağan edi. Kelecek afta onı rey berüvge çıqara bileler.
Malaysian Airlines ava şirketiniñ MN17 seferli «Boeing-777» uçağı Amsterdamdan Kuala Lumpurğa ketkende Ukraina şarqındaki Rusiye separatistleri zapt etken yerde 2014 senesi iyül 17-de tüşürilgen edi. 298 insan elâk oldı.
Ukraina ve Ğarp uçaqnı ya boyevikler, ya Rusiye arbiyleri tüşürgenini tahmin eteler. Rusiye bunı red etip, Kiyevni qabaatlay.
Bu sene iyül 15-te CNN Amerika telekompaniyası bildirdi ki, felâket taqiqatınıñ neticeleri boyunca esabat leyhasında mesüliyetli olaraq «Rusiyege qoltutqan separatistler» qayd etile. Resmiy qaynaqlar bu malümatnı şimdilik tasdıqlamadılar.
