Yarımada işğali ve memleketniñ şarqında keçirilgen arbiy areketlerden sebep Qırım ve Donbasstan qıtaiy Ukrainağa köçip kelgenlerniñ ekseriyeti eski yaşağan yerine qaytmaycaq.
Bunı iyül 16-da köçip kelgenlerni rey bermek aqqından marum qaldırğan yerli saylavlar aqqında yañı qanunnı izaatlap, «KrımSOS» cemaat teşebbüsiniñ tesisçilerinden biri ve koordinatorı Tamila Taşeva ayttı, dep haber ete Qırım.Aqiqat mühbiri.
«Al-azırda bir tedqiq azırlaymız, köçip kelgenlerniñ ekseriyetiniñ qaytacaq yeri yoq ve olar – «vaqtınca» degil, «memleket içinde köçip kelgen» insanlardır. Milliy qanunlar, Ukraina Anayasasına köre, şimdi yañı Anayasa ve detsentralizatsiya aqqında da çoq aytıla, bizler Ukrainanıñ bütün vatandaşlarını qorumaq kerekmiz, olar eskiden qayda yaşağanlarına baqmadan, şimdi yaşağan cemaatqa qoşulmaq kerekler», – dep qayd etti Taşeva.
Ukraina içtimaiy siyaset nazirliginiñ malümatına köre, Qırım ve Donbasstan köçip kelgenlerniñ sayısı 1,3 million insannı teşkil etti.
Qırım.Aqiqat bildirgeni kibi, ukrain uquq qorçalayıcıları Ukrainanıñ yerli saylavlar aqqında qanunını tenqit ettiler, olarnıñ fikirince, Qırım ve Donbasstan köçip kelgenler rey bermek aqqından marum qalalar.
