Keçken sene dekabr ayından berli Aqyardaki şahsiy mekteplerniñ maliye meselesi al etilmey, dep ayttı Aqyar Rusiye Qanun çıqarıcı meclisiniñ bücet boyunca daimiy komissiyasınıñ reisi Vâçeslav Aksenov.
Bunı o «Narodnıy kanal» efirinde ayttı, dep haber ete Aqyar Qanun çıqarıcı meclisiniñ matbuat hızmeti.
Onıñ malümatına köre, Aqyar ükümetiniñ vekilleri mektepke para bermek kerek dep ayttılar, lâkin tam qarar qabul etilmedi.
«Devletke bağlı olmağan mektepler Rusiye qanunlarına köre şeer bücetinden maliye etile bile. Tolusınen degil, faqat bir talebege köre para ayırıla», – dedi Vâçeslav Aksenov. Onıñ qayd etkenine köre, deputatlar Aqyar ükümetine bu sebepten bir qaç kere muracaat etken ediler.
«Talebelerniñ ana-babalarına mekteplerge maddiy yardım etmek zor oldı. Olarnı qapatmaq mümkün degil. Er biriniñ anane ve hususiyetleri bar. Lâkin ükümet Rusiye qanunlarını devletke bağlı olmağan mekteplerniñ maliye etilmesi meselesinde bozsa, oquv yurtları qapatıla bile», – dep qayd etti o.
Aqyarnıñ Rusiye ükümeti şeerniñ şahsiy mekteplerini maliye etüv meselesini şimdilik izaatlamay.
