Link açıqlığı

Rusiye ükümetinde Qırım ve Aqyar işleri komissiyası meydanğa ketirilecek – Medvedev


Rusiye baş naziri Dmitriy Medvedev yoq etilgen Qırım işleri Nazirligi yerine Qırım ve Aqyar işleri ükümet komissiyasını meydanğa ketirmege teklif ete.

Kremlniñ matbuat hızmeti bildire ki, böyle bir teşebbüs Rusiye Federatsiyasınıñ prezidenti Vladimir Putin ile körüşüvde seslendirildi.

«Böyle komissiyalar, söz sırası, Şimaliy Kavkaz ve Uzaq Şarqta bar. Qırım işleri boyunca komissiyanı ükümet seviyesinde de tikley bilemiz», – dedi Medvedev.

O, Qırım işleri Nazirliginiñ sabıq yolbaşçısı Oleg Savelyev Rusiye ükümetiniñ apparatına keçsin ve bu komissiyanıñ mesüliyetli kâtibi olsun istedi.

Bundan ğayrı, Rusiye baş naziri Qırım Rusiye Federatsiyasına iqtisadiy ve içtimaiy ceetten alışmağa devam etmek kerek, dep tüşüne. «Bu tez bitecek bir esnas degil. Memleketimizniñ diger topraqlarına baqqanda Qırım ne qadar keri qalğanını bilemiz», – dep qayd etti o.

Medvedev hatırlattı ki, Rusiye ükümeti yanında üç territorial Nazirlik qurulğan edi – Uzaq Şarq işleri, Şimaliy Kavkaz işleri ve Qırım işleri. Bunıñnen beraber, «idare sermiyasını arttırmaq ve federal organlarınıñ işini daa da faydalı yapmaq içün» yalıñız Qırım nazirligi yoq etile.

Qırım işleri Nazirligi 2014 senesi baarde Qırımnıñ Rusiyeniñ uquq ve iqtisadiyat boşluğına kirsetmek maqsadı ile meydanğa ketirilgen edi. Nazirlik Qırım ve Aqyarnıñ 2020 senesine qadar Federal maqsat inkişaf programmasını azırladı. Nazirlikniñ yolbaşçısı Oleg Savelyev olğan edi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG