Link açıqlığı

İyül ayınıñ soñuna qadar Qırım ile demir yol alâqalarınıñ ğayrıdan tiklenmesi al etilecek – «Ukrzaliznıtsâ» yolbaşçısı


2015 senesi iyül ayınıñ soñuna qadar Ukraina ükümeti Qırım ile demir yol alâqaları tiklenecekmi-yoqmı qarar alacaq, dep bildirdi Ukraina demir yol naqliyatı («Ukrzaliznıtsâ») Devlet memuriyetiniñ baş müdir vazifelerini eda etken Aleksandr Zavgorodniy RBK agentligine.

«Tehnikiy taraftan alâqalarnı ğayrıdan tiklemek imkânları bar. Gümruk ve sıñır nezareti ile bağlı bazı problemler mevcut. Ükümet alâqalarnı tiklemege avale etse, biz bunı bir saat içinde yapmağa azırmız. Mence, aynıñ soñuna qadar bu mesele çezilecek», – dedi o.

Onıñ aytqanına köre, bir sıra al etilmegen mesele bar ve baş nazir muavini Gennadiy Zubko reisligi altında aman-aman er afta bu meseleni baqqan ükümet komitetiniñ toplaşuvları ötkerile.

Zavgorodniy bildirdi ki, «Ukrzaliznıtsâ» trenlerniñ sayısını arttırmağa planlaştıra, şu cümleden, Qırım ile memuriy sıñırda olğan Novoalekseyevkağa qadar.

Memurnıñ qayd etkenine köre, al-azırda yürgen trenlerde vagonlarnıñ sayısı mümkün olğanı qadar arttırıldı

Rusiye Qırımnı işğal etken soñ 2014 senesi dekabr 27-den itibaren «Ukrzaliznıtsâ» havfsızlıqnı teminlemek maqsadı ile Qırım ile demir yol alâqalarını toqtattı, bundan ğayrı, yarımadağa qatnağan halqara trenlerni lâğu etti. Qırım trenleri Novoalekseyevka ve Hersonğa qadar qatnaylar.

2015 senesi iyün 16-da Ukraina Devlet sıñır hızmetiniñ vekillerinden biri dedi ki, yaqın vaqıtta işğal etilgen Qırım ile demir yol alâqalarını tiklemek imkânsızdır.

XS
SM
MD
LG