Qırımda Oraza bayram namazı kene de zenaat birlikleriniñ medeniyet sarayında qılınacaq, çünki yarımada paytahtı Aqmescitte Cuma cami alâ daa yoq.
«Oraza bayram namazı Qırım camilerinde iyül 17-de saba saat 6-da qılınacaq. Aqmescitte eñ büyük bayram namazı zenaat birlikleri sarayında (Kiyevskaya soq., 115) qılınacaq, Qırım Müftisi acı Emirali Ablayev de qoşulacaq», – dep bildire Qırım musulmanları Diniy idaresiniñ matbuat hızmeti.
Müftiyat qayd ete ki, bayram namazına biñlernen adam kele, amma Cuma cami olmağanından Qırım musulmanları Diniy idaresi namaznı başqa binalarda keçirmege mecbur.
Malüm olğanı kibi, Kiyevdeki İslâm medeniyet merkezinde iyül 17-de ukrain paytahtınıñ musulmanları Ramazan bayramını qayd etecekler.
Ramazan Bayramı – Oraza bitkeninen qayd etilgen islâm bayramıdır. Bu kün musulmanlar bir-birini «Bayramıñız mubarek olsun!» sözlerinen hayırlaylar. Bayram arfesinde fitir parası toplana. Para fuqare ve hastalarğa berile.
