Lviv şeer şurasınıñ deputatları «Qırımtatar medeniyet merkezi» cemaat teşkilâtı içün bina ayırmaq qararına qoltutmadılar, dep haber ete Galinfo internet-neşiri.
KrımSOS cemaat teşebbüsiniñ tesisçilerinden biri, «Lvivdeki Qırım Evi» Qırımtatar medeniyet merkezi» cemaat teşkilâtınıñ tesisçilerinden biri Alim Aliyev bildire ki, A.Teslenko, 4 adresi boyunca bina fena alda ve kommunikatsiyalar deñiştirilmeli.
«Deputatlarnıñ barıp binanı baqmaq içün bir ayı bar edi. Biz olarnı davet etken edik, lâkin kimse razı olmadı», – dep qayd etti o.
Onıñ aytqanına köre, qırımtatar cemiyeti binanı tamir etmege azır. Buña çetel adamlar, şahsiy fondlar ve metsenatlarnıñ paraları celp etilecek.
Aliyevniñ aytqanına köre, «Lvivdeki Qırım evi» tek qırımtatarlar içün degil, bu merkez farqlı medeniyet tedbirleri ile olacaq, şu cümleden qırımtatarca, ukraince, inglizce dersler berilecek.
Onıñ qayd etkenine köre, Qırım işğalinden sebep medeniyet merkeziniñ açılması müim oldı. «Qırımtatarlarnıñ sürgünligi vaqtında 73 halq esnafından yalıñız dörtü qaldı. Şimdi köremiz, Qırım işğalinden sebep kene de medeniyet mirasımıznı ğayıp ete bilemiz», – dedi Aliyev.
Bu qararğa 27 deputat qoltuttı.
Ukraina içtimaiy siyaset nazirliginiñ soñki malümatına köre, iyül 13-ke qadar 1 million 381 biñ 953 insan Qırım ve Donbasstan köçip keldi.
2014 senesi mart ayında Qırım Rusiye tarafından işğal etilgen soñ qırımlılar yarımadanı terk etip qıtaiy Ukrainağa köçmege başladılar. Donetsk ve Lugansk vilâyetleriniñ sakinleri Donbasstaki areketlerden sebep Ukrainanıñ diger regionlarına köçip keteler.
Meclis bergen malümatına köre, Qırımdan köçip kelgenlerniñ yarısı – qırımtatarlar. KrımSOS göñülliler cemaat teşkilâtınıñ malümatına köre, yarımadanı 45-50 biñ kişi terk etti.
