Rusiye prezidenti yanındaki İnsan aqları şurası Baş prokuratura, Adalet ve Tışqı işler nazirlikleri, em de Rusiye Federatsiya şurasına muracaatta bulunıp, «hata yapıp» uquq qorçalayıcılar teşkilâtı olğan Qırım alan missiyasını «istenilmegen teşkilâtlar» cedveline kirsetmemege çağırdı.
İAŞ saytında derc etilgen vesiqada qayd etile ki, Qırım alan missiyasınıñ yuridik şahıs statusı yoq ve teşkilât olaraq meydanğa ketirilmedi, onıñ büceti yoq.
O, 2014 senesi mart ayında Qırımda insan aqları vaziyetini nezaret etecek uquq qorçalayıcılarnıñ formal olmağan bir leyha olaraq peyda oldı. Al-azırda vaziyet online rejiminde közetile, dep qayd eteler şurada.
Prezidentniñ insan aqları şurasında deyler ki, Qırım alan missiyasını «istenilmegen teşkilâtlar» cedveline kirsetmek uquq ceetinden imkânsız.
İyül 8-de Federatsiya şurası Rusiyeniñ Baş prokuraturası, Tışqı işler nazirligi ve Adalet nazirligine «vatanperver stop-cedvelini» berdi – anda Rusiyede istenilmegen teşkilâtlar cedveline kirsetile bilecek 12 çetel ükümetten tış teşkilât mevcut. Mayıs ayında qabul etilgen qanunğa binaen, ticaretnen oğraşmağan teşkilâtlarnıñ faaliyeti «Rusiyeniñ anayasa qurumı, mudafaa azırlığı ve devlet havfsızlığı içün telükeli olsa», olar «istenilmegen teşkilâtlar» olaraq tanılacaq ve qapatılacaqlar.
