Link açıqlığı

Bütündünya qırımtatar kongressi Rusiye ve Qırım içün telükeli degil – Meclis


Qırımtatar Milliy Meclisi reisiniñ birinci muavini Nariman Celâlnıñ aytqanına köre, Türkiyede avgust ayınıñ başında keçirilmesi planlaştırılğan Bütündünya qırımtatar kongressi Rusiye ya da Qırım içün telükeli degil.

Böylece o Qırımnıñ Rusiye Devlet şurasınıñ spiker muavini Remzi İlyasovnıñ Ankarada keçirilecek Bütündünya qırımtatar kongressiniñ telükesi aqqında laflarını Qırım.Aqiqatqa izaatladı.

«Kongressten Rusiye devleti içün, Qırım içün bir de bir telüke yoq. Böyle bir sözlerni qullanacaq olsaq, qırımtatar ekseriyetiniñ fikirleri, istek ve tahminlerine qarşı çıqıp, olarnı başqa yoldan alıp ketecekler içün telüke ola bile», – dedi Celâl.

Onıñ aytqanına köre, kongresste Qırım ve qırımtatarlarnıñ vaziyeti muzakere etilecek, işbu tedbirniñ delegatları buña cevap berecekler.

Bazarertesi künü Qırım parlamentiniñ spiker muavini Remzi İlyasov Bütündünya qırımtatar kongressiniñ keçirilmesinde telüke körgenini bildirdi. Onıñ aytqanına köre, iyül 25-te cemaatçılıq iştirak etecek keniş forum keçirilecek, tedbirde üküm sürgen vaziyet, şu cümleden Türkiyede keçirilmesi planlaştırılğan kongress muzakere etilecek.

Bütündünya qırımtatar kongressini toplamaq qararı aprel 4-5 künleri Ankarada olıp keçken Türkiyedeki qırımtatar teşkilâtları platformasınıñ toplaşuvında qabul etildi. 2015 senesi fevral ayında Türkiyedeki 43 qırımtatar teşkilâtı ğayretini birleştirip, yekâne platforma çerçivesinde işbirlik tutmağa qarar aldılar.

Qırımtatarlarnıñ milliy lideri Mustafa Cemilev kongress delegatlarınıñ yarımadağa qaytması ile bağlı problemleri ola bilecegini tahmin ete.

Birinci Bütündünya qırımtatar kongressi Aqmescitte 2009 senesi mayıs ayında olıp keçken edi. 800 delegat iştirak etti – 12 memleketten 160 qırımtatar cemaat siyasiy teşkilâtınıñ vekili. Kongress prezidenti olaraq Refat Çubarov saylanğan edi.

XS
SM
MD
LG