Nevbetteki qanun çıqarıcı toplaşuvda şeer nizamnamesine deñişüvlerni kirsetecek olalar, şu cümleden valiniñ saylavları ile bağlı. Bu aqta jurnalistlerge Aqyar Qanun çıqarıcı toplaşuvınıñ reisi Aleksey Çalıy bildirdi, haber ete TASS.
«Nizamname deñişüvleri endi azır. Menimce, olarnı nevbetteki sessiyada qabul eterler. Amma vali saylavları aqta qarar aman amelge keçmey. Onı nevbetteki saylavlarğa azırlaymız. Şunıñ içün, fikrime köre, bu eñ müim deñişüv degildir, bundan da müim qanunlar bar», – dey Çalıy.
Sergey Menâylo Rusiye Federatsiyasınıñ prezidenti Vladimir Putinniñ teklifi ile 2014 senesi okâtbr 9-da vali yerine saylanıldı. Nevbetteki saylavlar 2019 senesi olacaqtır.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
