Ukraina Yuqarı Şurası yanında İnsan aqları boyunca vekâletli Valeriya Lutkovskaya Rusiye zenaatdaşı Ella Pamfilovağa Qırım maküm etilgenleriniñ qıtaiy Ukrainağa avuştırılması ile bağlı mesele boyunca muracaat etti.
Bu aqta Ukraina ombudsmenniñ matbuat hızmetiniñ beyanatında aytıla.
Beyanatqa köre, Qırım türmeleriniñ 22 maküm etilgeni ileride cezanı qataiy Ukrainağa çekmege istekleri aqta bildirdi.
Bu sebepten Lutkovskaya maküm etilgenlerniñ avuştırıluvı boyunca umumiy planı işlep çıqarmağa teklif etti.
«İşbu meseleni olğan halqara qaidelerniñ çerçivesinde al etmege mümkün olmağanını köz ögüne alıp, men Qırım territoriyasından maküm etilgenlerniñ qıtaiy Ukrainağa Ukraina ve Rusiye Federatsiyası ombudsmenleriniñ iştiraki ile avuştırılması içün ad hoc mehanizmniñ işlep çıqarılması aqta memorandum leyhasını azırladım», – dey Lutkovskaya.
Böyle mehanizmniñ leyhası endi Rusiye tarafına yollanıldı, onıñ teklifleri endi beklenile.
Evel bildirilgeni kibi, ukrain yarımadasınıñ Rusiye tarafından işğal etilmesi sebebinden Qırım apishanelerinde bulunğanlar Rusiye vatandaşlığını elde ettiler.
