Çarşenbe künü, iyül 15-de, Qırım Aqmescit ava limanına kelecek eki millionıncı turistni qarşılamağa azırlana, dey Qırımnıñ Rusiye başı Sergey Aksenov iyül 13 künü canlı efir vaqtında, haber ete Qırım.Aqiqat.
«İyül 15 künü Aqmescit ava limanında eki millionıncı turistni qarşılaymız», – dey Aksenov.
O şunı bildirdi ki, Aqmescit ava limanı ve Keriç parom keçiti daa iç bir vaqıt öyle faal sürette çalışmay edi.
Bugün Aqmescit ava limanı er künü 15 biñ yolcunı qabul ete. Keçit te bugün (iyül 13) tarihiy rekordğa çıqtı – eki tarafqa 30 biñ (insan): 18,5 biñ Qırımğa, 12 – Qırımdan, altı biñ avtomobil», – dey Aksenov.
Qırımda kurort mevsimi resmiy olaraq mayıs 1 künü başlandı. Millionıncı turist yarımadağa iyün 19 künü keldi. Bu turist – Sankt-Peterburgdan kelgen Tatyana Şubina oldı. «Krımskiy telegraf» neşirini bildirgenine köre, yarımadada musafirlerge memnün degiller, fiyatlar paalı.
Qırım akimiyeti 2015 senesi 4,3 million turistni qabul etmek niyetindedir.
