Qırımnıñ Rusiye Devlet şurası reisiniñ muavini Remziy İlyasov Ankarada 2015 senesi avgust başında keçirilmesi planlaştırılğan Bütündünya qırımtatarlarnıñ kongressini «havflı tedbir» olaraq tanıy.
Bu aqta o Keriçte qırımtatar cemaatçılığı ile körüşüvde bildirdi, haber ete akimiyet tarafdarı Krıminform saytı.
İlyasovnıñ aytqanı kibi, kongress «kâğıtta endi 6 yıl bardır».
«Em diaspora, em milliy areketteki teñkitçiler onı çağırmaq, ğayrıdan saylamaq ya da qapatmaq kerek olğanı aqta ayta edi. O bir şey yapmağan vaqıtta, onı keçirmek ne acet? Menimce, maqsat bir – teşkilât adından nasıldır bir bildirüvlerni etmek içün birini reis vazifesine saylamaqtır», – dey İlyasov.
O şunı qayd etti ki, iyül 25 künü cemaatçılıqnıñ iştiraki ile keñ forumnıñ keçirilmesi planlaştırıla. Mında şimdiki vaziyetni ve olacaq Bütündünya qırımtatarlarnıñ kongressini muzakere etecekler
«Qırımda yaşağan qırımtatarlarnı nasıl aqibet bekleycegini bilemiz. Bundan hayırlı bir şeyni beklemege kerekmey. Semetdeşleriñ takbih etilecek, memleketiñ, Qırımıña iftira atılacaq bir kongresste iştirak etmege istemez edim», – dey İlyasov.
Bütündünya qırımtatarlarnıñ kongressini toplamaq qararı aprel 4-5 künleri Ankarada olıp keçken Türkiyedeki qırımtatar teşkilâtları platformasınıñ toplaşuvında qabul etildi. 2015 senesi fevral ayında Türkiyedeki 43 qırımtatar teşkilâtı ğayretini birleştirip, yekâne platforma çerçivesinde işbirlik tutmağa qarar aldılar.
Qırımtatarlarnıñ milliy lideri Mustafa Cemilev kongress delegatlarınıñ yarımadağa qaytması ile bağlı problemleri ola bilecegini tahmin ete.
Birinci Bütündünya qırımtatar kongressi Aqmescitte 2009 senesi mayıs ayında olıp keçken edi. 800 delegat iştirak etti – 12 memleketten 160 qırımtatar cemaat siyasiy teşkilâtınıñ vekili. Kongress prezidenti olaraq Refat Çubarov saylanğan edi.
