Qırımnıñ Rusiye prokurorı Natalya Poklonskayanıñ Qırım prokuraturanıñ dörtte bir qısmı – qırımtatarları olğanı aqta bildirüvi – Qırım akimiyetiniñ qırımtatarlar oña sanki qol tutqanını köstermek içün yapqan nevbetteki ıntıluvıdır. Amma bu iç te aqiqatqa uymay, bunı Qırımtatar Milliy Meclisi reisiniñ birinci muavini Nariman Celâl Qırım.Aqiqatqa bildirdi.
«Poklonskayanıñ mantığını añlap olamayım, kene de şimdiki Qırım akimiyetine qırımtatarlarnıñ qol tutuvını köstermek isteyler, ğaliba. Menimce, prokuror hanımnıñ soñki bildirüvi aynı şu sıradan. Aqiqatta ise, prokuraturada çalışqan vatandaşlarımıznıñ tam sayısı belli degil», – dey Celâl.
O şunı da qayd etti ki, evel Meclis temsilcileri Ukraina uquq qoruyıcı organlarında qırımtatarlarnıñ sayısını arttırmaq teklifi ile defalarca buyurğan edi, amma olarğa red ete ediler, şimdi de, dey Celâl, bir şey deñişmedi.
«Yaqında Qırım akimiyetiniñ temsilcisi ile qonuştım. O, qırımtatarlarğa uquq qoruyıcı organlarına işke kirmek içün bir tabu olğanını açıqtan ayttı», – haber ete o.
Qırımnıñ Rusiye prokurorı Natalya Poklonskaya dey ki, qırımtatarlar onıñ müessise hadimleriniñ dörtte bir qısmını teşkil ete.
Qırımnıñ Rusiye tarafından işğalinden soñ Mecliste ve diger uquq qoruyıcı teşkilâtlarda yarımadada yaşağan qırımtatarlarğa nisbeten basqı yapılğanını bildireler. Qırımtatar faalleri yarımadanı terk etmege mecburlar, qırımtatarlarnıñ yetekçileri – Mustafa Cemilev ve Refat Çubarovğa Rusiye akimiyeti Qırım kirişini beş yılğa yasaq etti. Qırımtatar matbuat vastaları qapatıla, bazıları qıtaiy Ukrainağa avuştı.
