Link açıqlığı

Çubarov: Meclis Qırımnıñ kelecek taqdiri aqqında bütün muzakerelerniñ iştirakçisi olmalı


İyül 10 künü Ukrainada İtaliya elçisi Fabritsio Romano iqametgâhında qırımtatar halqınıñ yetekçisi Mustafa Cemilev ve Meclis reisi Refat Çubarovnıñ Ukrainada akkreditatsiyadan keçken diplomatlarnen iş körüşüvi kеçti. Körüşüv iştirakçilerini qırımtatar halqınıñ ve Qırımda insan aqlarınıñ vaziyeti ile tanış ettiler.

Bu aqta Çubarov Facebookta yaza.

Onıñ malümatına köre, körüşüv çerçivesinde taraflar qırımtatar halqı aqlarınıñ temin etüvinde işbirlik noqtalarını muzakere etti.

«Bunıñ ile qırımtatar tarafınıñ mevamı böyle edi: Rusiyeniñ Ukrainağa qarşı istilâsı ve Qırım işğalinden sebep peyda olğan buhrannıñ çezilmesi içün keçirilgen halqara körüşüv, muzakere ve añlaşmalarda Qırımnı işğalden azat etmek ve yarımada üzerinde Ukraina mustaqilligini ğayrıdan tiklemek kibi talaplar qayd etilmeli. Qırımtatar Milliy Meclisi Qırımnıñ kelecek taqdiri aqqında bütün muzakerelerniñ iştirakçisi olmalı», – dep yaza Çubarov.

Ukraina prezidenti Petro Poroşenko Ukraina Anayasasınıñ detsentralizatsiya (ademi merkeziyet) maddesini taqdim etip, qırımtatarlar içün «milliy-medeniy muhtariyet» aqqında ayttı. Anayasa komissiyasınıñ azası ve Ukraina parlamentiniñ «Petro Poroşenko Blokundan» deputatı olğan Qırımtatar Milliy Meclisiniñ reisi Refat Çubarov buña sert cevap berdi. Meclis reisiniñ fikirince, yarımadanıñ tamır halqı tarihiy vatanında taqdirini belgilemek aqqını qazanmalı. Bu olmasa, Meclis reisi yaqın künlerde parlamentniñ sessiya zalına kirecek Anayasa deñişmeleri aqqında qanunğa rey bermeycegini bildirdi.

XS
SM
MD
LG