Qırımtatar Milliy Meclis reisi muavini İlmi Ümerov dey ki, Meclis azalarına iftarlarnı azırlağan bir sıra qırımtatar qavehane ve restoranlarınıñ saipleri uquq qoruyıcı organları tarafından basqı duymağa başladı.
Bunı o Qırım.Aqiqatqa bildirdi.
Ümerovnıñ aytqanı kibi, o, Meclis zenaatdaşları içün Bağçasarayda iftar keçirecek edi.
«Birinciden, menim dört qız torunımdan soñ oğlan torunım doğdı – müim bir adise. Ekinciden, şimdi muqaddes Ramadan ayıdır. Bu sebepten Qırımda yaşağan Meclis azaları içün iftar bermege niyet etim. Yani, dostlar degil de, aynı bu daire. Soy-soplarım içün, dostlarım içün ayrı iftarlarnı endi yapqan edim», – dey Ümerov.
Bağçasaraynıñ qırımtatar qavehaneleriniñ birine muracaat etse, saibi red etti. Diger qavehaneniñ saibinden de aynı cevap keldi.
«Bağçasarayda eki qavehane bar, olardan beklemedim, biri-biri artından red ettiler. Bu insanlar – semetdeşlerimizniñ sırasından menim tarafdarlarım ola», – dey o.
Onıñ malümatına köre, qavehane saipleri öz areketlerini akimiyet ve uquq qoruyıcı organları tarafından basqı olğanı ile añlatalar.
«Olar (qavehane saipleri, – muar.) olarğa ayaq çalmamaq rica eteler», – dep qoşa Ümerov.
O, qavehanelerge akimiyet tarafından basqı olacağından saqınıp serlevalarını aytmay.
Bağçasaray rayon şurasınıñ başı Refat Derdarov Meclis azaları içün iftarlarnı keçirgen qavehane saiplerine basqı etilgeni aqta malümatnı red ete.
