Link açıqlığı

Qırımtatar Milliy Meclisi reisiniñ birinci muavini Nariman Celâl İnsan aqları boyunca Qırım alan eyyetiniñ Rusiye Federatsiya Şurası tarafından tasdiqlanılğan «vatanperver stop-kâğıtı»na kirsetilmesini Qırım аqqında kerçek malümatqa qarşı küreş olaraq adladı.

Bu aqta o Qırım.Aqiqat mühbirine ayttı.

«Qırımnıñ, ve umumen Rusiyeniñ bugünki vaziyeti maña cenkten soñ AQŞ añdıra, o vaqıt anda kommunistlerge qarşı, ya da orta asırlarda cadılarğa qarşı av alıp barıla edi. Bu yayğara tek bir şeyge bağlı – bugün Rusiye vatandaşı içün doğru malümatnıñ elde etilmesi imkânsız olğanını istey. Akimiyet sakinlerni, telekorüv aqqında aytsaq, diñleyici ve seyircilerni çeşit taraflama malümatnı elde etmek imkânlarından marum etmege tırışa», – qayd etti o.

Celâl dey ki, İnsan aqları boyunca Qırım alan eyyeti «Qırım insan aqlarınıñ bozuluvını qayd etmege ve halqara teşkilâtlarğa bildirmege yardım ete edi».

Rusiye Federatsiya Şurası Baş prokuraturağa «istenmez teşkilâtlar» aqqında qanun boyunca teşkerilecek 12 çetel teşkilâttan ibaret cedvelni yolladı. Cedvelge Şuranıñ 156 azası qol tuttı.

Evel bildirilgeni kibi, «vatanperver stop-kâğıtına» «Açıq cemiyet» İnstitutı (Soros Fondu), Demokratiya milliy fondu, Halqara cumhuriyet institutı, Halqara meseleler boyunca milliy demokratik institutı, Makartur Fondu, Freedom House, Çarlz Stüart Mott Fondu, «Demokratiya içün tasil», Şimaliy-Avropalı demokratiya merkezi, Bütündünya ukrainlerniñ kongressi, Ukrain Bütündünya koordinatsion şurası ve İnsan aqları boyunca Qırım alan eyyeti kirdi.

XS
SM
MD
LG