Qırım meselesi yarımadanıñ işğalcilerden azat etilüvinden soñ qapatılır. Bu aqta Ukraina milliy havfsızlıq şurasınıñ kâtibi Oleksandr Turçinov Rusiye Tış işler naziri Sergey Lavrovnıñ «Qırım meselesiniñ qapatılğanı» aqta bildirüvini izaatlap ayttı.
Onıñ sözlerine köre, Sergey Lavrov, Rusiye yolbaşçılığı kibi, «Qırım meselesiniñ qapatılmasını arz ete», – dep bildire Ukraina SNBO matbuat hızmeti Facebook saifesinde.
«Bu mesele tek işğalniñ toqtatıluvı ve yarımadadan Rusiye ordularınıñ çıqarıluvından soñ qapatıla bile», – dey o.
«Rusiye arbiy-deñiz flotu da Aqyarnı terk etmeli. Çünki onıñ anda bulunuvı aqta Añlaşma qaba sürette bozula. «Qırım meselesi» ile tam olaraq yalıñız QMCde ukrain akimiyeti tertibatınıñ ğayrıdan tiklenmesi ile qapatıla bile», – dey Turçinov.
Rusiye Tış işler Naziri Sergey Lavrov dey ki, BRICS ve SCO sammiti devamında Rusiye şeriklerinden iç biri Qırımnıñ Rusiye territoriyası olaraq tanılmağanı aqta bildirmedi.
«Qırım meselesi, menimce, bunı er kes añlay, qapatıldı. Onı Qırım halqı ve Rusiye Federatsiyasınıñ qararları qapattı», – dey Rusiye Tış işler Naziri.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
