Link açıqlığı

Herson vilâyetinde Qırımtatar Milliy Meclisiniñ temsilcisi peyda oldı


Herson vilâyetine iş ziyareti vaqtında Qırımtatar Milliy Meclisiniñ reisi Refat Çubarov regionda Meclis temsilcisiniñ tayinlevi ve resmiy temsilcilikniñ açıluvı aqqında ilân etti. Bu aqta Qırım.Aqiqat mühbirine Herson regional Mecisniñ başı Asan Aliyev bildirdi.

Onıñ aytqanı kibi, Herson vilâyetinde Meclis temsilcisi Abmecit Suleуmanov oldı, Meclis temsilciligini Hersonnıñ özünde açacaq olalar.

Bunıñ ile Aliyev dey ki, Qırım ile memuriy sıñırdan keçüvnen bağlı meselelerde yardım köstermek ve arizalarnı qabul etmek içün temsilcilikni Hersonda degil de, Geniçesk rayonında açmaq kerek.

«Hersonda Milliy Meclis temsilcisi ne yapacaq? Qırımtatarlar toplu yaşağan yerde ve muracaatlarğa tez sürette seslenmek içün sıñır yanında olmalı. Gece saat ekide maña telefon etkende, tez barsam – bu bir. Eki, büyük mesafe olğanda, bir şey yapıp olamam», – dey o.

Abmecit Suleymanov Eskender Bariyev ve Sinaver Kadırov ile Qırımtatar halqınıñ aq-uquqlarını qorçalav komitetiniñ koordinatorı ola.

Qırımda uquq qoruyıcı faaliyeti içün faaller taqip etile edi. Böyleliknen, olarğa başta dekabr 10 künü İnsan aqları kününe bağışlanğan tedbirlerni keçirmege yasaq ettiler, Qırımda qırımtatarlarnıñ aqlarına bağışlanğan matbuat konferentsiyasında tarikçiler olarnıñ üstüne zelönka septirdiler.

Yanvar ayında Abmecit Suleymanov, Eskender Bariyev ve Sinaver Kadırov Qırımdan çıqqanda, Çonğar kiriş noqtasında yaqalandı. Sinaver Kadırovnı Qırımdan müddetsiz sürgün ettiler.

Cinaiy taqipten qorqıp, Abmecit Suleymanov ve Eskender Bariyev de Qırımnı terk ettiler.

XS
SM
MD
LG