Qırımda iyül 17 künü Oraza bayramnıñ qayd etilecegi sebebinden raatlıq künü olaraq ilân etilgen, – haber ete Qırım.Aqiqat.
Mütenasip avaleni Qırım Rusiye akimiyetiniñ başı Sergey Aksenov imzaladı.
Vesiqada qayd etilgeni kibi, raatlıq künü «Rusiye Federatsiyasınıñ 1997 senesi sentâbr 26 künü qabul etilgen №125-FZ «Vicdan serbestligi ve diniy birlikler aqqında» qanunınıñ 4-ünci maddesi ve Qırım Cumhuriyetiniñ 2014 senesi dekabr 29 künü qabul etilgen №55-ZRK/2014 «Qırım Cumhuriyetinde bayram ve hatıra künleri aqqında» qanunınıñ 2-nci maddesine köre ilân etilgendir.
2014 senesi Qırım akimiyeti «Qırım Cumhuriyetinde bayram ve hatıra künleri, zenaat bayramları aqqında» qanun leyhasını azırladı. Onı Qırım baş nazir muavini Konstantin Baharev ve spiker muavini Remzi İlyasov teklif etken ediler.
Vesiqada qayd etilgeni kibi, diniy bayramlarğa Paşaliya, Troitsa, Oraza ve Qurban bayramları kire.
