«Ukrainskiy dom» Qırım emek ve medeniy işbirlik merkezi» cemaat teşkilâtınıñ başı Andrey Şçekun işğal etilgen Qırımda ukrain tilinde tasil yasaq etilgenini bildire, şu cümleden böyle imkândan yuqarı sınıf talebeleri marum qalğan.
Bu aqta o Kiyevde iyül 8 künü «Ukrainada 2014-2015 seneleri ukrain tiliniñ vaziyeti» serlevalı esabatnıñ taqdimi vaqtında ayttı, haber ete Qırım.Aqiqat mühbiri.
«Bunı Qırımda lingvotsid olaraq adlayım. Bağçasarayda ukrain tilli sınıf bar edi, işğalden soñ onı böldiler, balalarnı bile beraber qaldırmadılar, rus tilli sınıfta olsa da. Yani ukrain tilli ana-baba ve talebeler arasında bağ olmasın dep, balalarnı farqlı sınıflarğa avuştırdılar», – dey o.
Şçekun aytaqanı kibi, Qırımda 400 ukrain tilli sınıftan şimdi 50 çalışa, yekâne ukrain gimnaziyası al-azırda «ruslaştırılğan».
«Tek bir muvazi qaldı, 1-9 sınıfları, Rusiye qanuniyetine köre, yuqarı sınıflarda ukrain tili, ya da başqa bir tilde oqumağa yasaqtır»«, – dey Şçekun.
Mında taqdim etilgen malümatqa köre, Qırımda ukrain tili fakulteti de qapatıldı, o endi Qırım Federal universitetiniñ slav filologiya ve jurnalistika fakultetinde kafedra oldı.
Cemaatçılar deyler ki, Qırımda ukrain tilini ya fakultativ şeklinde, ya aftada bir kere ögrenmege mümkün.
Bunıñ ile faaller mecburen köçip kelgenler muracaat ete bilgen ukrain tiliniñ bedava ögrenilmesi boyunca leyhanı taqdim ettiler: movaua.org.ua.
