Qırımtatar Milliy Meclis reisiniñ muavini İlmi Ümerov avugst 1-2 künleri Ankarada Bütünlünya qırımtatarlarnıñ kongressinde iştirak etmek niyetindedir. Bunıñ ile Ümerov akimiyet tarafından Qırım vekillerine basqı ola bilecegini red etmey. Bu kibi fikirni Meclisniñ reisi muavini Qırım.Aqiqatqa bildirdi.
«Şimdi vekillerniñ cedveli tizile, Qırımdan da, şu cümleden. Menimce, er kes özü qarar alacaq: kongresste iştirak etmekmi, yoqmı. Bu vaziyetniñ eñ menfiy tarafı: qaytqanda, repressiyalar olurmı, asılında qaytmağa çare olurmı. Biz kefalet bermeymiz. Qırımdan Bütündünya kongressine barğanlar em mesüliуet, em telükeni añlamaq kerektir», – dey Ümerov.
Bunıñ ile o şunı da qayd etti ki, «qorqu qorqaqlıqqa çevirilmemek kerek, ve millet, milliy areket, kendimiz ve balalarımız içün etilgen şeylerni devam ettirmek kerekmiz».
Ümerov şunı da bildirdi ki, işbu kongress «aytuvlı ve timsaliy olur». «Bunıñ ile aktsentler Qırım tışına avuştırılır. Ve Bütündünya qırımtatarlarnıñ kongressi ve onıñ institutları aqiqatta esas bir qurulış ola bile», – dedi o.
Bütündünya qırımtatarlarnıñ kongressi 2015 senesi avgust 1-2 künleri Ankarada (Türkiye) keçirilecek.
Birinci Bütündünya qırımtatar kongressi Aqmescitte 2009 senesi mayıs ayında olıp keçken edi. 800 delegat iştirak etti – 12 memleketten 160 qırımtatar cemaat siyasiy teşkilâtınıñ vekili. Kongress prezidenti olaraq Refat Çubarov saylanğan edi.
