Qırımnıñ Rusiye akimiyeti Aqmescitte Kozlov soqağındaki çarşıda çalışqan iş adamlarına tazminatnı ödemege söz bere. Bunı Qırımnıñ şimdiki başı Sergey Aksenov bugün, iyül 7 künü, brifingde bildirdi, – haber ete Qırım.Aqiqat.
Aksenovnıñ sözlerine köre, şimdi Aqmescitte Kozlov soqağındaki çarşıda çalışqan iş adamlarına destek programması daa azırlanıla, tazminatnıñ planlaştırılğan miqdarı «bir 100 biñ rubleni teşkil etecek»’.
«Aqmescitniñ Merkeziy çarşı rayonında qanunsız qurulışlarnıñ yıqıluvı boyunca ketişat devam etecek. Ticaret muayyen territoriyalar içerisinde alıp barılmalı. Bütün ayat «ne yerde istesem, anda quracam» ümdesine köre yaşap olamamız. Vaziyetke doğru qıymet kesken iş adamlarına minnetdarım. Yardım programması azırlanıla, iş adamlarına bir 100 biñ ruble miqdarında tazminatnıñ olması planlaştırıla», – dey Aksenov .
Aqmescit memuriyetiniñ başı Gennadiy Baharev çarşınıñ yıqılması afta soñuna qadar bitirilecegini bildirdi.
Qırım.Aqiqat bildirgeni kibi, saba iyül 6 künü Aqmescitte politsiya Kozlov soqağında yerleşken çarşını sarıp aldı, mında ticaret noqtalarını yıqmağa başladılar. Aqmescitniñ şeer memuriyetiniñ başı Gennadiy Baharev dey ki, «tedbirler Nazirler Şurasınıñ RK№465 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» ve şeer memuriyetiniñ №25 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» qararları negizinde keçirile».
Aqmescitniñ Kozlov soqağındaki yıqılayatqan çarşınıñ satıcıları Qırım Nazirler Şurası binasınıñ yanında numayış keçirgen ediler.
Evel şeer memuriyetinde aytılğanı kibi, mında ticaret qanunsız sürette keçirile eken. Aqmescitniñ Kozlov soqağındaki çarşını endi bir qaç sene devamında yıqacaq olalar, amma iş adamlarınıñ narazılığı keder ete edi.
