Qırımnıñ Rusiye başı Sergey Aksenov yarımadada «yerli memularnıñ yamanlavı boyunca sımarlanğan kampaniyanıñ» ketmesi aqqında bildirdi ve Qırımda Rusiye Federatsiyası prezidentiniñ vekâletli temsilcisi Оleg Belaventsevniñ ve Qırım parlamentiniñ spikeri Vladimir Konstаntinovnıñ iştiraki ile vekâletli insanlarnıñ yaqalanuvı ile oğraşaycaq bir komissiyanı teşkil etecek oldı.
Bu aqta o iyül 7 künü Qırım Nazirler Şurasınıñ toplaşuvında ayttı, haber ete Qırım.Aqiqat.
«Cumhuriyet namını lekelemek içün bizge qarşı sımarlanğan iş alıp barıldı», – dey Aksenov.
«Elâl işlegenler menim şahsiy destegime ve qoruvıma işana bile. Biz – men, Oleg Belaventsev ve Vladimir Andreyeviç (Konstantinov – muar.) er kes içün bir fikir şekillendirecekmiz, bir kimseni qurtarmaq içün degil de, amma vaziyetni kergin etmek ve Qırımnı bir qaparcılıq regionı olaraq köstermege tırışqandar bar ki», – dep qoştı o.
«İnformatsion bir yalandır. Bugün çalışqan komanda Qırımda evel olğanlardan eñ ırızlı ve saftır», – dedi Qırım spikeri Vladimir Konstantinov.
Qırımda qaparcılıq bar olğanını o red etmey, amma, spikerniñ fikrine köre, seviyesi ğayet alçaq, em de onı memurlarğa qapar bergen qırımlılarnıñ özleri peyda ete ekenler.
Qırımnıñ Rusiye başı Sergey Aksenov dey ki, Qırımnıñ sanayı siyaseti naziri Andrey Skrınnikke qarşı devlet mülkiniñ hırsızlavı aqta qabaat uydurılğandır. Qırımda Rusiye FSB idaresi iyün soñunda Skrınnik devlet mülkiniñ hırsızlavında şeklengenini bildirgen edi. İyün 30 künü Qırım ve Aqyar boyunca FSB idaresi Qırım bergi hızmetiniñ başı Nikolay Koçanovğa nisebeten cinaiy işniñ açılması aqta bildirdi.
