Link açıqlığı

Qırımnıñ Rusiye akimiyeti Aqmescitte Kozlov soqağındaki çarşıda çalışqan iş adamlarına yañı iş yerlerini bermege vade ete.

Bu aqta Qırım Nazirler Şurasınıñ reisi muavini Dmitriy Polonskiy bildirdi.

Qırımnıñ Rusiye akimiyeti matbuat hızmeti bildirgeni kibi, baş nazir muavini «iş adamlarınıñ mülkine zarar kösterilmez, şeer akimiyeti onı yañı yerlerge ketirmege yardım eter» degen eken.

«Bir qaç iş adamı, men ve uquq qoruyıcı organlarınıñ temsilcileri ile barıp, malları saqlanılğanında emin oldılar. Şimdi bir tertipni işlep çıqardıq ki, oña köre insanlar öz malını qolay alıp olacaq, bu vaqıtqace o saqlanılacaqtır. Akimiyet ögünde turğan esas vazife – insanlarğa yañı yerlerni bermek. Merkeziy çarşınıñ müdiri degeni kibi, endi bir 110 ariza berilgen eken», – dey Polonskiy.

O şunı da qoştı ki, çarşıda Rusiye qanuniyetine köre qayd etilgen bir 250 iş adamı çalışa edi. Aynı zamanda Aqmescitniñ çeşit çarşılarında bir 270 boş yer bar.

Qırım.Aqiqat bildirgeni kibi, saba iyül 6 künü Aqmescitte politsiya Kozlov soqağında yerleşken çarşını sarıp aldı, mında ticaret noqtalarını yıqmağa başladılar. Aqmescitniñ şeer memuriyetiniñ başı Gennadiy Baharev dey ki, «tedbirler Nazirler Şurasınıñ RK№465 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» ve şeer memuriyetiniñ №25 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» qararları negizinde keçirile».

Aqmescitniñ Kozlov soqağındaki yıqılayatqan çarşınıñ satıcıları Qırım Nazirler Şurası binasınıñ yanında numayış keçirgen ediler.

Evel şeer memuriyetinde aytılğanı kibi, mında ticaret qanunsız sürette keçirile eken. Aqmescitniñ Kozlov soqağındaki çarşını endi bir qaç sene devamında yıqacaq olalar, amma iş adamlarınıñ narazılığı keder ete edi.

XS
SM
MD
LG