Saba iyül 6 künü Aqmescit merkezinde Kozlova soqağında yerleşken çarşını politsiya sarıp aldı, tuccarlar öz iş yerlerine keçip olamay. Qırım.Aqiqatqa iş adamlarından biri bildirgeni kibi, olarğa çarşınıñ yıqılacağı aqqında haber ettiler.
«Saba saat 8-de işke kelsem, mında er şey sarıp alınğan. Er yerde politsiya. Kimseni kirsetmeyler. Bir qaç kün devam etecek, deyler. Saba mında endi dögüş de yüz berdi, sanki iş adamlarından birisiniñ qolunı qırdılar», – dey erkek.
Mında yanğın maşinası, politsiya ve «acele yardım» maşinası tura. Çarşı qaravulı aytqanı kibi, maşinalar mında daa gece kelgenler.
«Sanki stadionda patlav aletleri bar dep ayta ediler, soñra ise bütün çarşını sarıp aldılar», – tarif ete qaravul.
Şaatlarnıñ aytqanı kibi, ticaret noqtalarından bütün malnı bir obağa topladılar, tuccarlar açuvlana ve qavğa eteler.
Aqmescitniñ şeer memuriyetiniñ başı Gennadiy Baharev dey ki, «tedbirler Nazirler Şurasınıñ RK№465 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» ve şeer memuriyetiniñ №25 «Topraq damartılarınıñ kapital qurucılıq obyektleri olmağan obyektlerden temizlevi ile bağlı sualler aqta» qararları negizinde keçirile».
Aqmescitniñ Kozlova soqağındaki çarşını endi bir qaç sene devamında yıqacaq olalar, amma iş adamlarınıñ narazılığı keder ete edi.
