Qırımda Qıtaydan turistlerni qabul etmege azır degiller, dedi Qırımnıñ şifahane-kurort kompleksi ve turizmі boyunca Delvet şurası komitetiniñ başı Aleksey Çernâk.
Bu aqta o akimiyet tarafdarı Krıminform saytına bildirdi.
Onıñ sözlerine köre, küzde Qırımğa Qıtaydan bir 500 turist kelecektir.
«Şimdi sentâbrde bir 500 turistniñ kelmesi beklenile, amma, doğrusnı aytqanda, olarnı mükemmel sürette qabul etip olamaycaqmız. Bizde Rusiye qanuniyeti boyunca tasnifni keçken ve yıldızlarnı alğan bir obyektimiz de yoq. Qıtay turoperatorları turistlerini tek yıldızlı musafirhanelerge ketirmege azırdır», – dedi Çernâk.
Cumhuriyetniñ bir 15 musafirhanesi Rusiye «yıldızlarını» elde etmege istegini bildirdiler.
«İç bir obyekt birden elde etalmadı. Şimdi er kes tamir işleri ile oğraşa, adiy şeyler, misal içün bala havuzlarına basamaqlarnıñ yüksekligi ve keñligi başqa olmalı. Ümüt etem ki, musafirhanelerden er biri sınıflaştırmanı keçer»,– dedi Çernâk.
Onıñ aytqanı kibi, Qırımda çin grupplarını qabul etmek içün qılavuz ve cemaat ğıdalama obyektlerini azırlamaq kerek.
«Çinler, Avropalılar kibi degil, bir-eki kere varenikniñ tadına baqsalar da, bir afta onı aşamazlar. Bizde ne qılavuz, ne terciman, birden yüz çinni qabul ete bilecek restoranlarımız yoq. Şunıñ içün iş pek çoq. Eki-üç aydan soñ birinci gruppalarınıñ kelmesi mümkün», – dey o.
Bildirilgeni kibi, Rusiye akimiyeti «Qırımnı Qıtay vatandaşlarına açıq etmek içün» Çita ve Aqmescitni ava seferleri ile bağlamaq niyetindedir.
