Anayasa komissiyası Qırımnıñ memuriy-territorial qurulışında qırımtatarlarnıñ mevamını nazarğa almadı. Bu aqta Qırım.Aqiqat mühbirine Ukraina Yuqarı Şurasınıñ reisi muavini Oksana Sıroid bildirdi.
«Eñ büyük belâ şunda ki, Anayasa deñişüvleriniñ kirsetüv ketişatı açıq-aydın degil edi. Menimce, esas problemlerden biri – qırımtatar temsilcilerniñ celp etilmemesidir. Olarnı eşitmedik. Olarnı eşitse edik, qarar başqa olur edi, belki», – dedi Sıroid.
O şunı da qayd etti ki, Anayasanıñ memuriy-territorial qurulış aqqında bazı deñişüvleri oña «hucur» körüne.
Evel Qırımtatar Milliy Meclisiniñ reisi Refat Çubarov Ukraina prezidenti Petro Poroşenkonıñ qırımtatar halqınа milliy-medeniy muhtariyetni bermek teklifi ile razı olmağanını bildirgen edi. O dey ki, eger de qırımtatarlarnıñ öz-özüni belgilev aqları ile bağlı deñişüvler kirsetilmese, Anayasanıñ akimiyetniñ detsentralizatsiyası aqta deñişüvleri içün rey bermeycek eken.
