Kiyevde iyül 3 künü Ukrainada Rusiye elçihanesiniñ konsul bölügi yanında Rusiyede yaqalanğan qırımtatarlarnıñ qoruyıcısı Rafis Kaşapovğa qol tutuv numayışı keçti. Faaller şiarlarnı seslendire ve Rusiye bayrağını taptay edi, haber ete Qırım.Aqiqat.
Toplanğan faaller, olardan birisi «siyasiy qaçaq» olğanını bildirdi, «Rusiye – azatlıq cellâtıdır. Rusiye – halqlarnıñ türmesidir», «Putin – birinci terroristtir», «Rafis Kaşapovğa azatlıq», «Putin GULAGnıñ mabüslerine azatlıq» kibi şairlarnı seslendire edi.
Aktsiya iştirakçileri Rusiyeniñ bütün siyasiy mabüslerini azat etmege talap etti, olarnıñ arasında Qırımda yaqalanğan rejissör Oleg Sentsov ve faali Aleksandr Kolçenko da. Aktsiyanı Rusiye temsilciliginiñ binasını qoruğan uquq qorçalayıcıları nezaret etti. Binadan faallerge kimse çıqmadı.
Faaller iç bir beyannameni tizmedi ve elçihanege bir şey bermediler, çünki bunı fadyasız olaraq tanıylar. «Bu divarlarda bizim kâğıtlarımızdan tek külerler», – dey aktsiya teşkilâtçısı Sergey Krükov.
Aktsiya iştirakçileri Rafis Kaşapovnı «vicdanlı musulman», cemaat erbabı ve uquq qoruyıcı olaraq tanıylar. Onıñ apiste olğanını qanunsız dep qayd eteler.
İyül 3 künü Naberejnıye Çelnı Rusiye şeeriniñ mahkemesi yerli tatar cemaat merkeziniñ başı, tatar faali Rafis Kaşapovnıñ işini baqmağa başlay. Onı nefret ya da duşmanlıqnıñ peyda ettirüvi ve İnternet vastası ile separatizmge çağıruvında qabaatlaylar.
Söz üç metn aqqında kete: «Qırım ve Ukraina işğalcilerden azat olur», «Tünevin – Gitler ve Dantsig, bugün – Putin ve Donetsk!», «Ukrainanı ve bütün türk dünyasını qurtarayıq» ve «Rusiye olğan yerde – ölüm ve közyaş» fotokollajı. Bu sebepten oña qarşı bir qaç maddelerge köre cinaiy iş açıldı.
