Link açıqlığı

İyül 3 künü Naberejnıye Çelnı Rusiye şeeriniñ mahkemesi yerli tatar cemaat merkeziniñ başı, tatar faali Rafis Kaşapovnıñ işini baqmağa başlay. Onı nefret ya da duşmanlıqnıñ peyda ettirüvi ve İnternet vastası ile separatizmge çağıruvında qabaatlaylar, haber ete Radio Svoboda.

Söz üç metn aqqında kete: «Qırım ve Ukraina işğalcilerden azat olur», «Tünevin – Gitler ve Dantsig, bugün – Putin ve Donetsk!», «Ukrainanı ve bütün türk dünyasını qurtarayıq» ve «Rusiye olğan yerde – ölüm ve közyaş» fotokollajı. Bu sebepten oña qarşı bir qaç maddelerge köre cinaiy iş açıldı.

Taqiqatçılarnıñ muracaatı ile keçirilgen teşkerüv neticelerine köre, Kaşapovnıñ metnlerinde «ruslar», «Rusiye akimiyeti», «yarımadanıñ işğalci akimiyeti», «prezident Vladimir Putin» kibi kategoriyalarğa nefret doğurıla. Bundan ğayrı, tatar faaliniñ maqaleleri, deyler taqiqatçılar, Qırımda Rusiye akimiyetiniñ areketlerine menfiy munasebetni ve yarımadanıñ Rusiyege qanunsız qoşuluvı aqta tasavurnı teşkil ete. Bunıñ ile, qabaatlayıcı tarafnıñ fikrine köre, Kaşapov Qırım Rusiye territoriyası olmağanını bildire ve yarımadanı Rusiye işğalinden qorumağa çağıra.

«Sova» rusiye haber-analitik merkeziniñ ekspertleri yanvarde Rafis Kaşapovnıñ yazıları ile tanış olıp, yasaq bir şey tapmadılar.

İyün soñunda Naberejnıye Çelnı şeer mahkemesiniñ qararı ile Rafis Kaşapovnıñ tevqif müddeti avgust 26-na qadar uzattırıldı. İmayesi buña Tataristan Yuqarı mahkemesinde itiraz bildirecek ola.

Evel bildirilgeni kibi, iyül 3 künü Kiyevde Rusiye konsullığı binasınıñ yanında faalge qol tutuv aktsiyası keçirilecektir.

XS
SM
MD
LG