Link açıqlığı

Saatnıñ esas haberi

Qırım ressamı Aqmescitte «Keramikanıñ tılsımlı küçüni» qırımtatar qaydeleri ile taqdim etti


Aqmescitte, «Qırımtatar medeniy-tarihiy asabalıq müzeyinde» ressam Elvisa Tatarovanıñ «Keramikanıñ tılsımlı küçü» sergisi açıldı.

Qırım.Aqiqat mühbiri bildirgeni kibi, sergide 60-tan ziyade iş taqdim etilgen, şu cümleden keramik resimler, panno, yaraştırıcı tabaqlar ve ilâhre. Onıñ işleri Qırım, qırımtatar mimarcılıq ve örneklerine bağışlana.

«İşlerimde özüm yapqan çamurnı ve tuvğanlarım, mühlislerim Qırımnıñ çeşit köşelerinden ketirgen balçıqnı qullanam. İşimni çamur tüsünde, renk çeşitlerinde qurmağa tırışam. Böyleliknen, çamurnıñ bir qaç çeşitinden resimlerim peyda ola», – tarif ete usta.

Bu onıñ ekinci şahsiy sergisidir. Açılışqa kelgen musafirler müellifniñ ustalığına yüksek qıymet kestiler.

«Qırımtatar sanaatında keramistler – ğayet küçlü alqadır, bu saada çalışqan ustalarnıñ sayısı ğayet büyüktir. Yüksek seviye ustası Rustem Yakubov edi. Şimdi Rustem Yakubov ve Remzi Seythalilovnıñ icadiy yolağını devam etken böyle ressamnıñ peyda oluvı pek quvandıra. İşbu bağnıñ üzülmemesini isteyim», – dey sanaatşınas Elmira Çerkezova.

Ressamnıñ sergisi belli qırımtatar ressamı Ramiz Netovkinniñ sergisi ile muvazi şekilde keçe. Tessadüfen degil, çünki olarnıñ işleri aenkdeşlidir, dep tüşüne ressam. Balalıqtan Netovkinniñ icadı ile meraqlanğanını bildire.

Elvisa Tatarova 1983 senesi Samarkandda (Özbekistan) doğdı. 1998 senesi Kezlev sanaat mektebini bitire, 2011 – Qırım müendis-pedagogik universitetini. 2008 senesinden çeşit sergilerniñ iştirakçisi ola. Qurman rayonı Büyük-Onlar qasabasında yaşay.

XS
SM
MD
LG