Qırım Yuqarı Şurasınıñ sabıq deputatı Vasiliy Ganışnıñ apis cezasınıñ lâğu etilmesi aqta itiraz arizası boyunca iyül 1 kününe keçirilmesi planlaştırılğan mahkeme toplaşuvını başqa künge keçirdiler.
Bu aqta Qırım.Aqiqatqa sabıq deputatnıñ advokatı Andrey Rudenko bildirdi.
«Bunıñ sebebi – Kiyevniñ Peçersk rayon mahkemesi vesiqalarnı Appelâtsion mahkemege yollamadı», – dey advokat.
Onıñ aytqanına köre, yañı toplaşuv iyül 8-ne planlaştırılğan.
Bundan evel advokatı Ganışnıñ qabaatlavı içün sebep olmağanını bildirgen edi. Bu sebepten Rudenko müşteriniñ cezasını uzattırmaq içün sebep körmey. Ukraina Prokuraturası yanındaki QMC prokurorınıñ birinci muavini Nazar Holodnitskiy prokuraturanıñ Ganışnıñ işi boyunca mevamı deñişmegenini bildire.
Kiyev şeeriniñ Peçersk rayon mahkemesiniñ mahkemecisi Yuliy Farkoş çarşenbe künü iyün 24-de qıtaiy Ukrainada QMC prokuraturasınıñ sabıq Qırım deputatı Vasiliy Ganışqa tevqif müddetiniñ uzattırılması aqta şefaatını qabul etti. Sabıq deputatnıñ tevqifi avgust 16-na qadar uzattırıldı, prokuratura ise iyül 19-na qadar uzatmağa rica etken edi.
Aprel 28-de Ukraina havfsızlıq hızmeti Ukraina Devlet sıñır hızmeti ile beraber onı Qırım çıqışında yaqaladılar. Ganış apiske alındı, çünki onı qıdıra ediler. Baş prokuratura onı devlet hainliginde şekley. Ukraina taqiqatçılarınıñ malümatına köre, Ganış Qırım statusı aqqında «referendum» keçirilmesine rey bergenlerden biri edi, ve böyle etip Ukraina topraq bütünligine zarar ketirmege tırıştı.
