Link açıqlığı

Qırımlılarnıñ mektüpleri: «Olar azır olğan şeyge kelip, başqasınıñ ğalebesini özüne bağladılar»


Bu künleri Qırımnıñ bir çoq Rusiye devlet kanalından birinde «Sotsialnıy Krım» («İçtimaiy Qırım» – muar.) yayınınıñ musafiri Qırımnıñ Rusiye emek ve içtimaiy siyaset naziri Yelena Romanovskaya oldı. Plâjda panduslar, saqatlar içün mahsus iskeleler, şişirme oturğıçları ve başqa şeyler bar. Nazir qayd etti ki, Qırımda bunıñ kibi bir plâj ilk sefer peyda oldı ve federal sermiyağa yapıldı. Onıñ aytqanına köre, şimdiki devlet ve maliyesi sayesinde saqatlarnıñ deñizge kelip, suvğa kirmek ve küneşte oturmaq imkânları bar.

Faqat Yelena Romanovskaya plâj ile bağlı bazı malümatlarnı yañlış bere. Endiden soñ saqatlar içün plâj Qırım Cumhuriyetiniñ «Tsentr professionalnoy reabilitatsii invalidov» («Saqatlarnı tedaviylev merkezi» – muar.) (müdiri – Şçukinskaya L.A.) Devlet bücet müessisesine aittir.

Plâj Ukrainanıñ devlet büceti ve Almaniyanıñ 2009-2010 seneleri bergen maddiy yardımı parasına yapıldı

Merkezniñ müdiri maqsatkâr bir insan olğanı içün bu plâj yapıldı. Daa doğrusı, plâj Ukrainanıñ devlet büceti ve Almaniyanıñ 2009-2010 seneleri bergen maddiy yardımı parasına yapıldı.

Merkez regionlarara müessise olıp, qısmen Ukraina devlet bücetinden maliye etile edi. Söz sırası, Rusiye Federatsiyasında saqatlar içün donatılğan plâjlar yoq. Ve Soçide, Olimpik şeerçikte bile saqat iştirakçiler içün bir de bir plâj yapılmağan edi.

Men Ukraina zamanında içtimaiy qoruv sistemasında çalışqan edim ve Şçavinskayanı tanıyım, onıñ faaliyetini bilem (saqatlar içün çoq şey yaptı). «Keçici müddet» olğanda plâjnı operativ idare müddetini arttırmaq meselesi nasıl baqılğanını bilem ve 100% bilem ki, Rusiye eyyeti tecribenen paylaşmaq içün kelgende Rusiyede saqatlar içün bunıñ kibi bir plâj olmağanını añlap, suqlanuvdan öle edi. Em deñizge qolay keçmek mümkün, em de bütün mahsus donatmaları bar.

Romanovskaya plâj Rusiye Federatsiyasınıñ parasına yapıldı degende yalan ayttı. Böyle bir şey olmadı

Ukraina vaqtında ukrain ve qısmen alman parasına plâjnı donatqan ediler. Rusiye Federatsiyası bu topraq damartısını operativ idare müddeti arttırılğanı içün buña alâqası bar olğanını aytadır. Añlaşmada Rusiye müüri olsa ve kefalet mektübini Aksönovnıñ muavini imzalağan olsa, bütün Qırımğa «Rusiye muvafaqiyetleri» ve «Qırım akimiyetiniñ ğalebeleri» aqqında aytmaq doğru degildir. Nazirniñ yalanı ve ukrain yeñişlerini Rusiyege bağlamaq ıntıluvı açuvlandırdı.

Susanna Raminina, qırımlı

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aks ettirip, muarririyetniñ baqışları ile aynı olmaması mümkün

XS
SM
MD
LG