Link açıqlığı

Saatnıñ esas haberi

Qırımtatarlarnıñ milliy lideri, Ukraina Yuqarı Şurasınıñ deputatı Mustafa Cemilev Rusiye işğali şaraitlerinde halqınıñ inkişafı imkânsız olğanını tüşüne.

Bunı o «Publiçnıye lüdi» neşirine bildirdi.

«Qırımtatarlarnıñ aqlarını qorçalaycaq bir tek şey – Qırımnıñ işğalcilerden azat etilmesi, çünki yarımadanıñ tamır halqı içün Rusiye terkibinde istiqbal yoq», – dey Cemilev.

Cemilev Rusiye Qırımnı maliyeviy qıyınlıqlardan sebep qaytaracağında emin olğan ekspertlerniñ fikrine qoşula.

«Ekspertler dey ki, Qırımnı bugünki onıñ tüşkün alında tutmaq içün er yıl altı-yedi milliard dollar kerek olur. Olarda daa Şimaliy Оsetiya, Abhaziya, Pridnestrovye bar. Rusiye hazinesi ebediy degil. Deyler ki, işbu arbiy maceralardan evel Rusiyeniñ yedegi 500 milliard dollar edi, şimdi ise 270 milliard oldı – bir yılda. Em de olar bücetni barrel içün 100 dollar negizinde qurğanlar, fiyatı ise tüşti ve daa da tüşe bilecek», – dey Cemilev.

Uquq qoruyıcılar aytqanı kibi, Rusiyeniñ Qırımğa kelgeninen qırımtatarlarğa nisbeten repressiyalar başlandı, bu sebepten insanlar qıtaiy Ukrainağa köçmege mecburlar.

Qırımtatar halqınıñ vaziyeti aqqında yarımdağa yaqında kelgen Türkiye eyyeti de aytqan edi. Rusiye akimiyeti bunı red ete, Rusiye Tış işler nazirligi «qırımtatarlarnıñ meselesini siyasetleştirmemek çağıra».

XS
SM
MD
LG